"الهري" أسلوب حياة
اهري يامهري وأنا على مهلي.. لسان حال أمثالي من هواة الفرجة اليومية على ناس هاريين نفسهم خناقات مع ناس تانيين هاريين الناس الأولانيين خناقات برضه!! والهري في قاموس اللغة المعاصرة له أكثر من معنى على حسب الموقف ... فهناك الهري الذي يصيب الزوجة الغيورة مع زوج "مقضٍيها" فلا تجد أمامها غير إنها تهري وتنكت في نفسها – قال يعني إحنا عرفنا معنى تهري لما هنعرف معنى تنكت – القصد يعني إنها بتبقى لا على حامي ولا على بارد سيبوها باللي هي فيه، قلبي عندها، كفاية اللي هاريها تأليف وكذب وحاوريني يا كيكة..
ثم تجد أن الهري يأتي بمعنى اللت والعجن، أينعم .. يهري يعني يرغي وياكل دماغك وودانك بكلام فاضي من برة وماليان أسافين وضرب تحت الحزام من جوه، راجع برامج التلاتة في واحد حيث المذيع هو الضيف هو المحلل الاستراتيجي هو ذات نفسه ناظر الزراعية أبو منشة وطربوش وقاعد ع القمة فارش فرشته ومش فاضي غير للسقطة واللقطة لفلان وعلان وهو برضه المخبر أبو جرنال مخروم وسوجارة سبارس وبالطو مقيح من كتر وقفته في الشمس بيراقب الخلق .. وإختصارا لهذه الخلطة السرية ولاد الحلال أطلقوا عليه (مذيع أمنجي)..
ثم يأتي الهري في موقف آخر بمعنى آخر وهو تقضية وقت الفراغ في التفاهة فيقعد يهري في أي كلام فارغ من بره ومن جوه.. راجع تعليقات الناس على فيديوهات اليوتيوب أغلبها شتائم بذيئة تدل على فراغ وحرمان عاطفي.. ما هو لو عنده ما يملأ هذا الفراغ ماكانش وصل بيه الحال إنه يقعد بالساعات يعلق على فيديوهات اتهرت مشاهدة من نوعية شاهد المذيع يخلع حذاءه في وجه الضيف (اللي هيعلق تعليق بذىء هنا ربنا هيوديه النار).
وعشان تتأكدوا إن الهري ده لغة العصر راجع كلامك منك ليها له وانتوا بتتكلموا كلام من عينة.. الواد ابني ده لو شفته أنا ههريه ضرب، البتش اعتتشدال صاحبتشى بنتشي الإيه وحشتني قوي لو شفتها ههريها بوس، حرام عليكي يا ماما احنا اتهرينا كشري غيًري الصنف بقه.. الناموس هراني وأنا نايمة لازم أرش الأوضة بكرة.. المدرس هراني أسئلة شفوي وماعرفتش أجاوب.. حيث إن الهري أصبح أسلوب حياة..
إنما كله كوم والهري المتبادل بين فريقين يقفان على طرفي النقيض ده كوم تاني حيث يصل بهم الهري المتبادل إلى درجات من الاستماتة في دفاع كل منهم عن اللي يخصه وأحيانا يصل بهم إلى مراحل متقدمة من الجنان الرسمي في تبرير أخطاء من يخصه.. جنان جنان!! كتاكيت كتاكيت!! ده لو أمك مش هتبررلها كده يا أخي ما اللي يغلط قول غلط وخلاص..
انت شفت يا عم؟ لا ماشفتش بس هو كده.. انت ياعم التاني ياللي بتهري هناك انت، شفت بعينك ولا سماعي برضه؟؟ سماعي آآه... كله سماعي كده يعني محدش عنده معلومة مؤكده أومال هاريين أبونا تبريرات وتحليلات وأبوك السقا مات.. بس هو العيب مش عليكو العيب على اللي بيسمع ويقرأ ويشاهد كل الهري ده ومستسلم له.. بس أنا مش هستسلم.. أنا من موقعي هذا ومن واقع خبرتي في سماع ومشاهدة وقراءة كم معتبر من الهري السياسي قررت أن أشارك في الحياة السياسية بحزب جديد سوف أطلق عليه حزب (المهريين الأحرار) والله الموفق والمستعان.
واقرأ أيضاً:
تعليقات الأعضاء