حصار معرفي أو وسواس قهري أنا تعبت! م15

حصار معرفي أو وسواس قهري أنا تعبت! م14
 أنا في كرب شديد
 
 أنا قلت هبعت من نفس الإيميل علشان يبقى الاستشارة مترتبة على الاستشارات السابقة
 أنا كنت دايما أشتكى من أني خايفة أدخل في علاقة أو في خطوبة وتقدملي ناس كتير جدا وكان الرد الرفض فقعدت مع حد كويس فى التعليم والثقافة وواخد كلية قمة ولكن smoker فقعدت معاه وقالي الموضوع منتهي بمجرد ما نتخطب، اتخطبنا وعمال يحاول يبطل تدخين، يبطل شوية ويرجع يدخن
 
 المشكلة أن حد بعتلنا أن الموضوع أكتر من الـ smoking فطبعا انهرت وادمرت وقعدنا معاه قال إن الموضوع ماضي وأنه دلوقتي مفيش حاجة وفعلا هو دلوقتي ناجح فى شغله ومسؤول جدا وهو اللي مجهز شقته وبار بأهله جدا ونفذلي كل اللي أنا عايزاه وحنين جدا ومثقف جدا جدا وعاقل جدا ولكن من ساعة ما جاءت لي الرسالة إن كان فيه أكتر من الـ smoking وأنه جرب حاجات أكتر زي الحشيش والبرشام وأنا حصل لي relapse رهيب وقررت أنسحب ودخلت في نوبة obsessions رهيبة وكأني لم أتعرض نهائيا للعلاج ولا أخدت دواء
 
 كلمت الـ psychiatrist بتاعي قال لي لا تستاهلي حد أحسن حتى لو هو كويس
 طبعا كلامه آثر معايا جدا، ذهبت لدكتور جديد قالي أدام دا اللي رجعك للمرض نفشكل
 كلمت الـ psychotherapist لكن أنا لو هقولك تفشكلي لأن أنت هتقرفيه وأنت شخصية متعبة
 كلمت psychotherapist جديدة إنسانة محترمة جدا وحكتلها الموضوع بالتفاصيل قالتلي فيه وساوس شديدة ومينفعش تاخدي قرار بناء على توقعات الوسواس واتعالجي الأول وبعدين قرري قولتلها الدكتور قالي فشكلي قالتلي كل لما تدخلي علاقة هتدوري على حاجات تخليكي تنسحبي، مينفعش تاخدي قرار مدفوع بأفكار وسواسية
 
 ولكن الوقت بيعدي وحاولت أفشكل كذا مرة ولكن كان هروب من الضغط وهو متمسك بي وبلغته أني مريت بفترة obsessions قالى مفيش مشكلة، شوفى إيه اللى يريحك وأعمليه، لو عايزني نروح لـ psychatrist تحكي له المشكلة روحي، لو عايزة ترجعي تاخدي الأدوية خديها،  دلوقتي الفكرة اللي مسيطرة علي أنه ممكن يكون addicted وهو مفيش دليل على كدا وشغله مستقر وشغال شغل أصلا بيعملوا فيه تحليل كل فترة
 
 بس حتى لو جرب في الماضي ما يمكن يرجع تاني،  هو بيقنعنى بيقولى هرجع ازاي وهو كان طيش شباب وأنا دلوقتي حياتى مستقرة، لقيت واحدة بعتتلي بتقولي لو حد جرب زمان ممكن يرجع بعد فترة طويلة جدا لأن صاحبتها حصل معاها كدا فكل الآراء دي مزودة الوساوس جدا جدا،  هو الفرق بيني وبينه 8 سنين
 
 هو عاقل ومتفهم تقلباتي المزاجية ومستحملني بس بقول ما هو السبب في التقلبات دى ودايما أقوله كدا، هو مصلي ودايما يديني ثقة بنفسي ومشجعني على نجاحي
 بيجيلي وساوس حتى من أي فعل كويس بيعمله
 أنا حاليا في حالة نفسية شديدة مأثرة على شغلي وحياتي وصحتي بحس بإن قلبي بيوجعنى وإن هيحصلي حاجة، أهلي شايفينه محترم ومصلي وبار بأهله ومسؤول عن حياته وهو اللي عامل شقته بنفسه وبيسعى سعي جبار وراجل وجدع
 
 لما بقعد معاه بقعد أسأله أسئلة كتير جدا لدرجة أنه كذا مرة يحس أنه في محكمة
 والسؤال مش مرة واتنين وتلاتة وأربعة
 ممكن السؤال يتكرر فى كل مقابلة، أسئلة عن الماضي
 الأفكار اللي مسيطرة علي كلها من ناحيته خاصة من ناحية الـ  addiction، الدكتورة قالتلي أنت مشفتيش يعني أيه حد addicted أصلا
 
 اللي مسيطر علي فكرة بتقول أن هو حتى وهو بيقولي عمري ما هبقى addicted
 هو الـ addicted أصلا بيعرف يسيطر على نفسه، دا مستحيل دا بيبقى إلحاح قهري لل substance وهل أي حد addicted كان بيفكر أصلا إنه هيبقى كدا
 أنا مش عارفة أعمل إيه، فرحي قرب وأنا مش قادرة أفرح ولا أتبسط ولا أختار عفشي وفي حالة اكتئاب
 بأخد انافرانيل وفافرين بس مش باستمرار
 
 بيهدوني ودا بيخوفني، بحس إن حالة القلق بتحميني وبتخليني أفكر في الاحتمالات اللي ممكن تحصل
 محدش حاسس بي من أهلي، بعاني معاناة فردية قافلة الأوضة علي وماسكة موبايلي على طول
 
 أنا بعت لأني بثق في رأي حضراتكم
 محتاجة رأي حد متفهم وحكيم
 30/3/2025

وأضافت بعد 13 يوما تقول:
أنا في كرب شديد
   
لمَ لم يتم الإجابة على استشارتي الأخيرة بخصوص أمر خطبتي
12/4/2025