التجربة ما هي التجربة؟!

 مساء الخير
 
شكرا على الموقع الجميل والحقيقة معرفش لو حد مر بنفس التجربة دي وقدر يتخطاها ولا الموضوع صعب، إنك تدرس وتضيع وقت في حاجة مش بتحبها، في نفس الوقت اللي أنت عارف فيه أنت عايز إيه بوضوح وثقة،  كل اللي في سني ماشيين على التايم لاين المتعارف عليه من المجتمع (تخرج - شغل - استقرار)  وأنا بحس إني لسه هلف وأرجع لنقطة البداية، كأن فيه وقت اتسرق مني

خلاص أنا واخد القرار وواثق إني مش هعرف أعمل حاجة غير لما أكون بحبها، لكن الفكرة إن فيه إحساس تقيل لسه جوايا...
 
قلقان من إني حتى لو لقيت طريقة أوازن بيها بين تركيزي في الدراسة ولو فيه شغل أونلاين أو بارت تايم، مبقاش مبسوط برضه، وأبقى حاسس بالفراغ اللي التجربة دي سابته، وكمان الموضوع هياخد وقت عقبال ما أحقق حاجة ويبقى خلاص الكارير واضح قدامي..
 
مش مهم كدا كدا أنا متأكد هبقى مبسوط وقتها بس اللي فارق معايا إن التجربة دي مأثرة في أكتر مما كنت متخيل، بسبب كمان إني كنت لوحدي فيها وساعتها كان وقت الكوفيد والأونلاين فمكنتش بروح أصلا فده زود الشعور ده..

ومش هنسى الأسباب اللي مكانتش بإيدي ورفض أهلي وطريقة تعاملهم مع الفكرة دي لما قولتلهم (هما عارفين مصلحتي وبلا بلا)
 
أنا عارف إنه لازم أبدأ أواجه كل ده، بس الفكرة إن الإحساس التقيل ده بيجيلي طول الوقت ومش متأكد أنا كدا هبقى بعوض نفسي فعلا، ولا بوهم نفسي عشان يبقى عندي سبب أحاول...
 
بفتكر تجربتي كتير وحاسس كدا إنها أثرت جامد في شخصيتي
وحتى بيبان علي وفي قلة تعاملي مع الناس حواليا
24/3/2025