أمي والزواج وأنا.... نظرة كل الأمهات

بسم الله الرحمن الرحيم

أشكركم جزيل الشكر على ما تقدمونه من نصح وإفادة وجزاكم الله عنا كل خير.
أحيانا أحس أن أمي مبتحبنيش، لا بحس إنها عايزة تخلص مني، من فترة طويلة لما كنت مرتبطة قفشتني بكلم الإكس وطبيعي رد فعل أي أم لما تلاقي بنتها بتكلم ولد إنها تقلق عليها أو تهزأها أو تخليها متكلموش تاني، بس اللي حصل بصراحة صدمني وهو إنها كانت حابة جدا موضوع إن أنا أرتبط وأحب وأول تجربة لي ومزعقتليش زي ما كنت متوقعة لأن ببساطة هي عاوزة تجوزني بأي طريقة وإزاي زمايلي وصحابي وكل اللي في سني اتخطبوا وأنا لا، رغم إني حاسة أن سني صغير جدا

نرجع لموضوعنا، لما حصل breakup فركيشة يعني ومكملتش مع الإكس بردو حصل منها موقف صدمني وهو إنها اتعصبت وليه مكملتش وليه مش عايزة تتخطبي زي البنات أنا عايزة أفرح بك ومش عارفة إيه

موقف ثالث بردو حصل كان زميلي في الشغل كان لطيفا نوعا ما معي وكان يساعدني كثيرا في الشغل بس أنا مكنتش حاسة من ناحيته بأي حاجة حرفيا كان مجرد زميل وفي مرة اتصل بي وأنا في البيت وماما شافت الموبايل ولما خلصت مكالمتي معه قعدت تسألني مين ده وبتتكلمو في إيه؟ قلت لها ده زميلي في الشغل وكان بيكلمني بس في حاجة عن الشغل مش أكثر وقلت لها إنه بيساعدني كتير بس قالت لي طب إديله فرصة شكله ابن حلال وشخص مناسب وبيحبك لو ادتي له فرصة هيتقدم لك علطول بس إنت اسمعي الكلام

المهم إني حسيته أڤْوَر في الاهتمام وبقت طريقته مفيهاش حدود معي فمسحت رقمه واتنقلت من القسم الذي كنت فيه عشان الموضوع ميطورش أكثر ومظلموش معي وبردو أمي قعدت تلومني على اللي أنا عملته لدرجة أنها قعدت فترة متكلمنيش وكانت بتعاملني وحش. كل ده عشان إيه؟

أنا لسة صغيرة مش عايزة أتجوز دلوقتي ومش معنى أنه كل اللي في سني اتجوز أنا كمان أتجوز دلوقتي
أرجو لو حد هيقول حاجة يبقى بذوق واحترام
15/1/2025