أبحث عن أبي وهو لا يريد

السلام عليكم ورحمة الله وبركاته..
 
أولا: أشكركم جزيل الشكر على ما تقدمونه من معلومات ومشورة جزاكم الله كل خير.
مشكلتي بدأت من زمان قوي أنا هاتكلم عامي أسهل، بابايا ومامتي اتطلقوا من وأنا عندي ٩ سنين، وقتها بابايا تزوج واحدة ثانية وسافر واختفى من حياتي تماما ٤ سنين
كنت بقعد أدور عليه وأسأل أهله عليه بس ماكنش حد بيساعدني في حاجة.
 
رجع بعد أربع سنين يكلمني ويدور علي بعد ما طلق مراته وخلف منها بنت، فضل بيتكلم من بعيد لبعيد، بيصرف عليّ ببخل رهيب ودايما بيهددني إنه هيبطل يصرف علي
بعدها راح اتجوز واحدة ثانية ولازم أتقبلها وأتقبله هو وبنته ومراته الجديدة وهم يستفزونني بكل الطرق علشان خايفة مايصرفش علي، للأسف بعد كل دا أنا بحبه أوي وبخاف عليه وبتصعب عليّ نفسي إني بحبه كل الحب دا بس هو عنده إصرار إنه يؤذيني
 
نفسي أبطل أحبه وأبعد عنه، أو نفسي يبقى كويس ويبقى عندي أب ما أحسش إني يتيمة، أنا لسه ما أقدرش أعتمد على نفسي ماديا، ومن وأنا عندي ١٠ سنين بقول إمتى أتجوز علشان ألاقي حد يعوضني
ولما فعلا حبيت واحد وهو حبني سابني علشان أهلي مطلقين!
 
ومن ساعتها وأنا حاسة إن ماحدش هيتقبل فكرة أنه يتجوز واحدة من عيلة مفككة وأب مش بيحب بنته أصلا، وحاسة إن أي واحد هتجوزه هيبقى نسخة من أبويا

مع إني بقدر كافي من الجمال والناس بتحبني وعندي صحاب ومتدينة وشاطره في دراستي، بس حاسة إني مستحيل أقدر أنجح في أي علاقة، ودايما هفضل حاسة بعدم أمان،إني هتساب في أي لحظة زي ما أبويا سابني

 وفي نفس الوقت أنا عايزة أتجوز علشان أخلص من ذل أبويا ليّ
 فعلا تعبت ومحتاجة حل
 12/1/2025